食完午飯，自雲咸街行落大道中，賓架P、律師H，和經濟師等人突然同向一位講緊電話嘅路人甲打招呼，左丁山抬頭一望，原來係大人物，連忙向佢問好，順帶講一句：「因住俾人偷聽、影相呀！」大人物梗係醒目仔女啦，講多一句立即收線，笑騎騎咁對左丁山講：「我行得正，企得正，俾狗仔隊影到都冇相干，我若無司機等候，一定唔飲酒㗎！」名人、大人物，高官呢個星期個個講飲酒與揸車，皆拜局長所賜，平常男人在外，飲一杯半杯酒，不當一回事，之後揸車亦不覺有酒精影響，不過做咗大官就唔係普通人咯，一舉一動受人注視，都唔知有邊位坐在鄰近用iPhone偷影、擺上YouTube，人怕出名豬怕肥，成咗名，就要付出減少自由嘅代價。十幾年前，一位隱形富豪冇人認識，家住南區而成日在九龍塘出現，自覺幾過癮，點知後來俾慈善機關總理捉住捐錢，照片上報，佢再去九龍塘就俾人認出係乜生，嚇到佢以後唔敢再去，佢老婆唔知幾安樂！上星期在馬場，在座人士盡皆馬會資深會員，自然談起局長飲啤酒之事，有人話局長應該立即認錯，有人話會員坐在會所內飲啤酒（唔知乜牌子咯，不過上到去山光道大牌檔，好似話柯打杯「波波啤」，侍應就知道係乜，反為正確牌子名稱就未必記得！）輕鬆吓，點解唔得，如果偷影拍照之人係會員，應受譴責。（至於飲酒後去揸車，乃另外問題。）於是大家討論到會所之內應否嚴防偷拍，保障私隱。當日（星期六）有報紙報導一位聖保祿醫院女清潔工兩年前在工作期間打瞌睡，被上司護士長用手機偷拍，後來將短片播俾女工睇，要佢辭職。個女工向私隱專員投訴聖保祿醫院，遭駁回，於是日前申請司法覆核，挑戰私隱專員。呢單案件幾過癮，睇吓法庭點樣判決。用偷拍照片為證據，逼下屬辭職都要打官司，在會所內不少名人明星大人物雲集泳池內，假如有人在泳池旁邊坐在太陽椅拿出iPhone睇電郵、上網，點知佢會唔會突然偷影賣俾傳媒㗎？即使不准攜帶手機到泳池旁邊，偷影人坐在咖啡室偷拍，亦防不勝防。啲私人會所管理人以後有排頭痛！