中央匯金一句入市增持，內銀股聞雞起舞，四大內銀升幅介乎2.6%至4.3%，翻查匯金舊年掃貨紀錄，於消息公佈後翌日，內銀股價繼續有好表現，所以有理由相信，內銀股今日會再次成為市場焦點。睇番匯金舊年10月入市後，消息公佈前嘅收市價，彷彿成為最抵價，除中行（3988）曾大幅跌穿，其餘3行均可穩守其上，一年後嘅今日，四大內銀分別有14%至20%升幅，假設未來一年走勢一樣，戰友可以噚日收市價作入市參考，再坐貨一年，話唔定會有意外收穫。資金由早前熱炒嘅土炮地產股，換馬至中資股嘅情況明顯，內房股靜極思動，有望成為下一輪追捧對象。世茂房地產（813）首9月銷售額達357億元，超過全年目標16.3%，冠絕內房股。按彭博綜合券商預測，世房2012年市盈率8.1倍，以龍頭嚟講絕對唔貴；最近喺13元水平打底，一旦展開升浪，上破今年高位14.08元冇難度。唐牛