好多中大校友唔妥民建聯陳克勤身為中大校董，喺今年立法會嘅動議辯論中，竟然反對捍衞學術自由議案，中文大學校友評議會通過譴責陳克勤，要求佢辭任校董。各位中大友可以放心，因為陳克勤唔會再做中大校董，但大家唔好開心得咁快，因為替補陳克勤嘅係同屬禮義廉嘅葛珮帆（EQ）！呢兩個消息，真係令人「樂極生悲」！
出身野雞大學惹爭議
陳克勤話，因為佢已經做咗四年中大校董，想畀其他人輪流做吓，所以民建聯會推舉EQ做校董，強調唔撈同當日反對捍衞學術自由遭受批評冇關喎。
呢位葛珮帆博士，呀唔係……係碩士至真，多年來已遭人質疑佢本來個博士學位係買番嚟，所以佢報名參選時，突然由博士降格做碩士，佢嘅「博士學位」係來自Greenwich University，加吓搬咗去巴基斯坦，被視為「野雞大學」，有錢就交易，當時「EQ博士」回應話，佢96年已喺呢間學校讀完博士，之後呢間大學搬咗去邊、點樣辦學就唔關佢事。
選舉期間，陳克勤同EQ點樣爭鄉事票已鬧出唔少風波，搞到兩個面左左，今日克勤讓埋呢個中大校董位畀「EQ博士」，究竟係跣佢，定係益佢，真係佢哋自己先知。至於邊個會做中大同港大嘅校董，下周五就揭曉。