新一屆立法會開鑼，議員助理好搶手。有啲新丁議員冇門路，索性登報請人，薪金方面可謂海鮮價，一萬幾千以至三、四萬都有，但會計界梁繼昌（Kenneth）就覺得，做生不如做熟，邀請自己嘅選舉經理做埋助理，而呢位仁兄大家一啲都唔陌生，就係近期俾左報抹黑嘅社運人士王浩賢。
嘩，王浩賢既然活躍於社運，近日仲被抹黑為反新東計劃幕後黑手之一，Kenneth驚唔驚呢位得力助手，日後冇時間幫佢做議會事務呢？Kenneth笑笑口話點會吖，聲言向對方講明，日後畀足時間佢搞社運，去埋警署保釋又點話？但最好唔使搞到坐監啦，否則自己一腳踢咯。浩賢有單遊行被控非法集結案今日宣判，希望佢大步檻過啦，否則Kenneth都好頭痕。