今季轉投火箭嘅華裔控衞林書豪（J.Lin、7號），周三正式披上戰衣，出戰對雷霆嘅季前熱身賽。由於只係熱吓身，所以J.Lin只係落場打咗20分鐘，表現都算幾唔錯，有3分、6次助攻。不過，失誤過多嘅毛病依然存在，全場有3個失誤。雷霆有杜蘭特同韋斯卜克，合共攻入32分；而火箭新秀T鍾斯，攻入全場最高20分。雷霆射手D曲克最後一擊失手，球隊105:107飲恨。
林瘋今場上陣時間唔多，瘋迷一定大嘆唔夠喉。火箭周六將會作客黃蜂。到時林瘋大戰「一眉狀元」安東尼戴維斯同A李華士，你又點可以錯過！（now678台周六8:00am直播）另外，湖人王牌拜恩因為肩傷，冇打對拓荒者場波，唞幾耐就冇人知。