DR醫療美容集團毒菌當補品，亂做療程濫用醫藥，懷疑因此搞出人命。無論最終有關人等會否負上刑責，元兇一定係DR。但成件慘劇，元兇之外，仲有三大幫兇。佢哋就係食衞局、醫委會同埋消委會，呢幾個監管機構，有事就出嚟抽水，平時就耍太極懶理美容業，殘害眾生。
食衞局
幾年前，美容集團「變靚D」旗下嘅多個醫生亂咁開藥，曾經有客人食咗醫生開嘅減肥藥，搞到抑鬱想跳樓。當時醫學會嘅蔡堅已經呼籲政府加強監管美容集團，此後嘅美容變毀容事故亦一宗接一宗，食衞局淨係識耍太極，繼續縱容不良美容集團。吳爽誠心跪求高永文今次痛定思痛，唔好學主子梁振英咁得個講字。
醫委會
醫委會前主席麥列菲菲好英勇咁話醫委會將主動介入調查DR事件。講到咁積極，但係血癌少女呂巧琳（小琳）07年喺威爾斯親王醫院接受化療，醫生錯將只能作靜脈注射嘅化療藥「長春新鹼」注入佢骨髓，最終不治。喺呢單案件上，醫委會喺事發後三年先跟進。事隔咗五年，醫委會先宣判將個醫生停牌兩年咁大把。
消委會
消委會總幹事劉燕卿認為，加強立法規管醫學美容刻不容緩。咁身為保障消費者權益嘅消委會又做咗啲乜呢？
今年初，一名患有癲癇症嘅青年，被舒適堡職員強行拉入店內游說購買健身療程，張約話3年，實質係30年，仲屈事主碌咗七萬幾卡數。事主向消委會求助，消委會只係建議佢循民事索償。
吳爽