近期每次升市，都有唔少股回吐，之前強勢嘅本地地產股，終於要跌，呢幾日開始由中資股接力，支撐大市，噚日內銀股特別勁，建行（939）升3%，突破頭肩底頸線轉強，重農行（3618）更升近6%。事實上，近期股份普遍升開就停唔到，睇嚟內銀股仲有機會繼續去，至於之前超勁嘅本地地產股當然要唞唞氣，而電訊設備股例如京信通信（2342）之類，亦開始接近阻力位，理應要整固吓。記得之前晉佳推介遠東環球（830），已經係今年3月嘅事，當時介紹完就停牌大半個月，然後復牌就急升，突破推介時嘅短線目標價1.53元，之後最高曾經去到1.93元，家又打番落去1.38元，即係回歸推介時水平，事實上呢隻股已經喺現水平橫行接近半年，長揸真係悶死人。講番中海系向來耐性十足，之前中國海外（688）收購中海宏洋（081）單Deal，由2009年8月開始，搞咗差唔多有年半，去到2010年底先搞掂，原因係原股東有啲爭拗，之後Settle咗，股價隨即打上去，其後9個月內股價升足兩倍，一係悶死人，一升就嚇死人。晉佳覺得，遠東環球個Case應該同中海宏洋冇乜兩樣，開頭大家都唔明中海宏洋究竟有乜寶，點知三四線城市賣樓超好，股價爆升，用市賬率（PB）計算，家中海宏洋PB 3.5倍，估值仲高過龍頭中海外嘅2.2倍。目前中國建築（3311）PB 3.5倍，遠東環球嘅2.7倍，要追到同中國建築睇齊，假設後者股價不變，遠東環球都應該要上到去1.80元。
首站目標價1.8元
中國建築當時全購遠東環球嘅價，係1.18元，由於肯以1.18元沽出嘅人，都已經喺全購時沽晒，所以今後極難跌穿呢個水平，因為已經貨落強者。另外，之後有基金以1.26元買入2.1%股權，令中國建築維持公眾持股量，既然基金呢個價願接貨，安全線又可以拉高啲，1.26元好難跌穿，事實上，收購完成到家，都未曾跌低過1.26元。橫睇豎睇輸面極低，問題只係幾時開始升，等咗半年，應該差唔多要發威，中線就以1.80元作為首站目標價，晉佳覺得中長線一定唔止1.80元。晉佳本欄逢周一、三及五刊出