「嘩，呢度好大呀！」「咦，Canteen喺地下㗎？」「哦，廁所原來喺呢度。」新一屆立法會噚日「開學」宣誓，唔少新丁對呢間新學校非常好奇，周圍走熟習環境，以免未來四年苦讀期唔知碇。八方寄望70位議員唔好讀政治屎片；身為班長嘅曾鈺成，千祈唔好偏私囉。
開學日，啱啱升班嘅新同學一定最緊張；唔少立會新丁噚日都有家人陪「返學」壯膽，唔少人仲等埋放學，管接管送好溫馨。好似新民黨嘅田二少，就有老婆同囡囡Lavina湊返學，仲喺立法會合照留念；難怪二少宣誓時咁順暢，有家人支持果然寧舍唔同。
議員家眷齊齊撐場
新民主同盟范國威捱到出頭天，宣誓一刻都想有家人在場，最後連同父母、家姐、細佬、老婆同阿囡，范家出動六人拉大隊為佢打氣，認真有氣勢。咖喱飯噚日仲兌現競選承諾，喺立法會紀念品店買咗份禮物畀寶貝女，多謝佢落力助選。工聯會剩女麥美娟仲未有另一半，惟有邀請契媽黃太「頂檔」陪返學，放學後仲拉埋契媽同嫻姐去立法會附近飲茶；葉劉淑儀亦未有第二春，囡囡榮欣惟有做住愛的替身，噚日喺現場為葉劉打點一切。mailto:[email protected]