講起蒙牛（2319），大家少不免會諗起毒奶，品牌想洗底，當然要搞吓新意思，可惜蒙牛連改包裝都俾人笑。最近蒙牛喺13年來首次大規模換包裝，口號係「只為點滴幸福」，全新廣告嘅英文版，就俾人係咁彈，話真係一啲都唔幸福。
英文口號超錯
蒙牛新廣告嘅英文版口號係「little happiness matters」，睇落好大機會係直接繙譯中文口號，但內地新華網記者搵勻北京、倫敦、華盛頓等唔同地方嘅27位外籍權威專家，一致裁定呢句英文嘅意思係「幸福並唔重要」、「幸福冇乜意義」。其實自從中糧集團入主蒙牛後，都吸引唔少外資基金入股支持，但就好似提升唔到佢哋啲英文水平囉。不過內地有網民話其實蒙牛冇錯，佢哋用中文啲同胞話「只為點滴幸福」，但就用英文話畀外國人聽呢度毫無幸福嘅真相，都幾切合國情㗎。