樂隊RubberBand嘅結他手阿正（馮庭正）今年5月畀本報影到佢帶住幾歲嘅囡囡去銅鑼灣行街親子樂，前日又見到佢行街，不過今次係同一位妙齡女子。前日下晝5點半左右，帶住牛仔帽嘅阿正喺金鐘太古廣場送一位着住透視裙嘅長髮少女搭車。
難捨難離
起初兩人都冇乜嘢有講有笑，不過行到一半因為少女條底裙太緊，所以一路行一路縮咗上去，搞到露出條內褲。阿正就拉埋個少女一邊，由裙底伸手入去，幫佢拉番條底裙出嚟，等佢唔使露底兼露屁股咁肉酸。阿正仲好順手拍咗個女仔屁股一下。之後就見阿正指手畫腳教個女仔去搭車，仲用埋部智能電話教佢點行。不過個女仔好似唔肯走咁，眼仔睩睩望住阿正，仲嘟起個嘴。阿正識做錫咗佢一啖，個少女先依依不捨咁離開。
點知少女一路行一路望番轉頭，行咗三步都係忍唔住行番轉頭，要阿正再三催四請少女又嘟住嘴望住阿正離開，反而阿正就急急腳返灣仔星街屋企。採訪、攝影：陳辰