新城DJ兼節目《新香蕉俱樂部》主持杜浚斌（Ben）早前被爆係真人版向西，佢去咗東莞常平一間夜總會尋歡，當晚仲帶女上酒店爆房。急色斷正，舊愛楊凱晴馬上大鬧佢人渣贈興，Ben又被揭09年媾過伍詠薇表妹、化妝師Jessica（梁賀婷），噚日又有Jessica閨中密友爆料話Ben喺拍拖初期向Jessica借咗大拿拿30萬，成日話分期攤還，聽講咁耐只還過五千蚊。Ben嘅臭史越爆越多，形象差到見底。
形象插水
Jessica嘅一頭紅髮熟口熟面，事關佢係無綫節目《盛女愛作戰》嘅化妝師，Ben雖否認同過Jessica拍拖，但Jessica嘅facebook有唔少佢哋頭貼頭同喺屋企影嘅相，話佢哋係普通朋友都冇人信。馮仁昭噚日打畀Ben求證，佢例牌否認話：「冇咁嘅事。」咁有冇問過Jessica借錢？佢話：「冇喎。」Ben仲死口話家同Jessica仲係幾好朋友。不過Ben明明被偷拍到北上尋歡，但之前都否認話係去夜總會傾生意，仲話同行北妹有上房，但轉頭走咗，佢話自己當晚爛醉到着住鞋瞓，咁嘅大話都講得出，佢呢鋪嘅可信性有幾高，大家都心中有數。問Ben覺唔覺連爆幾單負面新聞，形象差晒，佢話：「唔回應啦，啲嘢都擾攘咗一輪。」