本欄九月廿四日寫頭版新聞，內談及英基學校申請人須付出五十萬元debenture，當時係睇完報紙新聞有感而發嘅。有一位讀者來郵，謙稱自己係一位不自量力的英基家長，指報導有誤，左丁山所言有錯。電郵打印本擺放在左丁山寫字枱，好快就被其他剪報、紙張埋藏咗，正是out of sight，out of mind，點知上星期六到馬場，竟然與英基學校協會（ESF）主席唐家成同，於是醒起呢件事，但冇理由在內向唐主席詢問此事嘅唧，於是返到屋企就上網查一查，ESF宣佈嘅ESF Nomination Rights Scheme有幾個要點：（一）已有子女在校嘅家長不受影響。（二）現在英基小學學生不受影響。（三）2013/14學年有150個一年級至七年級新生學額，每個收取提名權（Nomination Rights）五十萬元，先付10%按金（五萬元），學童面試獲得取錄後，家長就要交埋餘下九成，如不獲取錄，五萬元按金全數發還，但如果學生獲取錄而不入學，五萬元按金不獲發還。150個位，每個50萬，總數有七千五百萬元，款項用以建造各項學校設施。好嘞，九月廿四日本欄所言，錯在邊度？錯用debenture呢個字眼啦，但要義係如非有錢人，幾難付出五十萬元為子女送入英基學校，當然早前入咗嘅就好着數，因為可以由兄姊帶埋弟妹吖嗎，（就是sibling priority政策），故此左丁山覺得冇乜誤導噃，不過呢類計劃通常係由大企業保送外來僱員子女入學嘅，由公司找數，咁又唔同。十月五日本欄談及「親疏有別自當然」，內有李玉蓮，李月蓮之分，一位馬讀者來電郵問：「文中所話李玉蓮是不是在浸會新聞系副教授嗎？中大教的是同一人嗎？」兩位係唔同嘅，只因名字相近，又同是中大新聞系畢業，做過記者，所以有時有人弄不清啫。浸大副教授李月蓮在新亞1981年畢業後得加拿大UBC博士學位，佢嘅同班同學包括著名填詞人潘源良與著名電影編劇/導演陳慶嘉（阿寬）。李玉蓮在新亞1983年畢業，著名同班同學有沙膽虹，還有當年電視觀眾人人識嘅林美香。