上海網球大師賽周三上演次圈賽事，開始有大牌球星上場，塞爾維亞「2哥」迪祖高域就輕鬆過關；而美網得主、英國球手梅禮更加不費吹灰之力，多得對手德國嘅美亞因傷退賽，唔使打就晉級。
力求繼中國公開賽之後，喺亞洲冧多口莊嘅迪祖，次圈對住保加利亞嘅迪美杜夫，完全冇壓力。前者只係用咗54分鐘，就極速以盤數2:0，K.O.咗對面位非種籽球手。佢下一圈嘅對手，將會係嚟自西班牙嘅洛比斯；佢同日以6:3、6:4，擊敗咗德國嘅高舒萊巴，希望佢可以畀啲考驗迪祖，令賽事精采啲啦。（now636台今日2:00pm起直播）
梅禮唔心急封爵
至於梅禮就更輕鬆，因為佢連打都唔使打就過咗關；今次可以汗都唔使出就晉身第3圈，真係要多謝美亞肋骨有傷，打唔到波而退出。梅禮賽後俾記者問，會唔會因為奪得美網錦標，打破英國球手76年嚟冇冠荒嘅宿命而封爵；佢就咁答：「我都唔係打咗好耐，仲有大把時間去比賽，所以接受王室嘉許呢啲嘢，可以再等遲吓先頒都唔遲。」講得咁瀟洒，人哋頒畀你，你唔通扮型話唔要咩？梅禮第3圈將會對烏克蘭球手杜高普諾夫。
至於瑞士「1哥」費達拿，對住台灣球手盧彥勳，盤數淨贏2:0，要用成80分鐘先解決對手，但過程算係有驚無險啦。