現代教育（1082）主席Ken Sir（吳錦倫）近日連番入市買新樓，早排盛傳佢用8431.5萬向新地（016）買入牛池灣峻弦一個複式單位，噚日作實，呎價近3萬蚊。呢位補習天王似乎偏愛新樓，可能貪自住又得，長線投資又得，一買一賣都易啲，完全唔驚樓市泡沫論。Ken Sir今年4月以1.28億沽出尖沙嘴凱旋門摩天閣（即係第一座）高層A室「大宅門」單位，呎價5萬蚊，造價破頂；個單位05年4月新地以6150萬一手賣出，消息話買家喺收樓期間用公司轉讓方式以5700萬轉售畀Ken Sir，計落Ken Sir持貨六年勁賺成7100萬。食髓知味，Ken Sir套現後加碼連買兩件新貨，除咗峻弦，今年5月佢斥資7816.6萬買入大埔白石角天賦海灣天池屋，呎價2.36萬；連同峻弦，合共投資1.62億，一來一回，要用多3400幾萬買樓，佢當然會用銀行按揭上會，不過早排金管局限制第二套房按揭上限，高價樓由五成收緊到四成，若果依足條例，新買嘅峻弦複式，Ken Sir可能要畀多一成樓價先上到會噃。