《大坑、銅鑼灣、跑馬地》
熊黛林噚日32歲牛一，身為男友嘅郭富城夜晚要去灣仔出席有份主演嘅電影《寒戰》首映禮，雖然表面好似冇時間陪女友慶生，不過原來前晚佢哋已經靜雞雞慶祝咗。熊黛林前晚同經理人Kim食完生日飯，明知有記者跟梗係扮乖返歸，不過半夜就心思思出動攻城，噚日有人目睹壽星女帶住勝利笑容由城城跑馬地寓所揸車走，跟住仲去買完嘢醫肚先再返自己大坑寓所，證明佢哋前晚一齊溫馨慶生。
小美：我冇吃飯
熊黛林前晚到城城家送外賣前，壽星女就同經理人Kim食飯，佢哋一行十人去咗銅鑼灣百富中心嘅名廚慶祝，嗰間大廈啱啱係城城經理人小美嘅辦公室所在。熊黛林由7點半食到11點，當壽星女前腳入，後腳即見七人車送小美嚟，佢都匆匆上樓，但小美留咗半粒鐘就走。熊黛林食飽走嗰時，唔見城城蹤影，佢坐經理人Kim架白色平治返歸，臨入寓所樓下大堂仲拎住袋禮物，眼利嘅佢仲轉身同記者揮手。
Kim前晚喺微博貼咗飯局大合照，佢仲留言畀熊黛林話：「生日快樂，不要快高長大了，祝你永遠開心。」熊黛林就唔避忌回應一句：「愛死你們。」記者噚日求證小美係咪去咗飯局，佢以短訊回覆說：「我冇吃飯，一直在公司工作，做到冇停手，全日未吃過飯。」
採訪、攝影：黃曉程、徐錦池