利福（1212）由04年上市到家，批股抽水只有05年的一次，其他喺資本市場嘅舉措，亦算合情合理（除咗07年做白武士買聯洲那一役，有啲儍仔之外），睇得出管理層係有心機經營。正當大家對佢股東出名財技了得呢件事放下戒心之際，利福突然宣佈要分拆，將一啲望埋去唔吸引嘅項目，湊埋一齊嚟上市。市場心生疑竇：大細劉今次搞邊科呢？
利福上市八年，成功喺內地搵到唔少新項目，股價有長進；但你睇個盈利貢獻分佈，銅鑼灣崇光（SOGO）仲係佔整體超過80%。似乎搞咗咁多年，利福仍然擺脫不了高度依靠老店嘅事實。芬佬朋友覺得，利福內地百貨未成氣候，更何況那些只值10多億元嘅「非百貨類資產」，感覺就更加無謂。
利福分拆有機會抽到嘅水，券商估大概只有4至5億元，平時借個loan、發隻bond都唔止呢個數，佢哋應該有其他考慮。近年有百貨企業鍾意拍住發展商搞綜合項目，用百貨嘅錢科水搞埋房地產。利福會否借分拆機會走上這條路，有待公司將來再解畫。
海迪