成功「升呢」嘅民建聯鍾樹根，都要識吓立法會同僚兼傳媒，但佢噚日開學禮上冇四出派片，可能因為之前卡片上嘅英文錯漏百出，趕唔切印新一批啦。身兼東區區議會主席嘅鍾樹根話過，若果兼顧唔到區會主席工作，會辭去主席一職。八方噚日聽聞，唔少人已經蠢蠢欲動，包括東區副主席黃建彬、區議員周潔冰同埋龔栢祥都想搶位，呢三個人嘅共通點係：清一色來自民建聯囉。眼見黨友為個位爭餐飽，鍾根會唔會為咗黨內河蟹，最終留任唔辭主席呢？