黃百鳴搞緊隻準新股天馬娛樂（8039），變相將古天樂打包上市，打造古仔概念股，成功將創意套用於搵銀之上。計菲菲話，天馬實情係一間投資公司。話說兩年前公司預支某演員（即係古仔）4800萬元，簽9部片約，平均每部533萬銀。咁早簽定，明顯當古仔係股咁炒，因睇好後市率先買入。家古仔身價超過1600萬元，估值大升，於是將「資產」上市，即賺9600萬元，真要寫個「服」字。菲菲相信未完成嗰7部戲，九成係爛片。首先，天馬拍片全部主打大陸市場，上年古仔做主角嘅賀歲片《最強囍事》，香港票房1900萬元，大陸就收1.6億人仔。單計舊年，公司內地票房收入係香港嘅8倍。大家都知，九成九畀強國人睇嘅「偽港產片」，都係爛片。另一個原因，魚缸金科玉律係好嘢一定唔上市，上市多數估值已見頂。如果呢批戲夠勁，古仔身價應該仲有得升，但假設黃百鳴認為古仔身價已見頂，所以先將佢上市，意味呢7部戲，應該唔慌掂。Fifi本欄逢周二、四刊出