日日都係「巴神」，悶唔悶啲呀！我求大俠都冇計，邊個叫巴洛迪利真係日日都有新搞作。巴洛迪利啱啱獲意大利國家隊重召，繼續受到重用；另一邊廂亦有傳佢同大肚女友拉菲娜破鏡重圓，仲畀傳媒影到佢哋激吻！
巴神周二去咗同拉菲娜見面，同場仲有拉菲娜嘅媽咪同幾個女性朋友，睇個樣似見家長多啲。但巴洛迪利繼續佢嘅風格，着到成個潮童咁，而拉菲娜就明顯大住個肚。見完家長，傳媒仲影到佢哋激吻，睇嚟愛火重燃，重新撻着。
「冇驗過BB嘅DNA」
巴神舊年同拉菲娜開始拍拖，俾人話佢着基斯坦奴朗拿度嘅舊鞋，但巴洛迪利唔理人哋點睇，同拉菲娜打得火熱。過咗熱戀期，佢哋喺今年4月鬧分手，之後嘅發展好似啲師奶劇咁，拉菲娜發現自己有咗巴洛迪利嘅BB！分手冇耐就有BB，巴神唔信拉菲娜，叫佢去驗DNA，仲話情已逝，就算個肚係佢，都唔會再復合。
不過，感情呢樣嘢唔係話斷就斷，巴神決定搵番拉菲娜，但佢嘅箍煲方法可能好多人都用過，就係電話攻勢，拉菲娜鬧番佢滋擾，唔知佢之後又出咗咩招，總之佢哋又喺番埋一齊。巴洛迪利發聲明話：「我決定同拉菲娜再試一次，但我哋係冇驗過BB嘅DNA。我之前咁講，其實因為面對呢種情況，無論主角係邊個，我都會建議驗一驗先穩陣。總之，我為過去幾月所發生嘅事，同埋傳媒所講所寫嘅感到遺憾，希望大家以後畀啲私隱我哋兩個。」
拉菲娜就好甜蜜咁話：「過兩日我就會去做超聲波，到時就知係仔定女，我就希望係女。我哋好快就做爸爸媽媽，我第日生嗰陣，巴洛迪利都會喺我身邊，我希望同佢永不分離。」
愛情得意，巴神喺國家隊嘅前途亦都美好。喺周二嘅訓練，意大利教練柏蘭迪利派「巴神」同基奧雲高打雙箭頭，蒙杜利禾就踢進攻中場支援，睇嚟好有機會喺對阿美尼亞嘅世盃外正選披甲。