四年先影一次開學相，理應執得正一正，有成13個議員嘅民建聯都千叮萬囑所有新丁舊將，影相時男嘅着番西裝打黨呔、女嘅一定要戴黨絲巾。民建聯出名黨性強，呢班河蟹學生當然個個冇違規，仲擺咗勁chok嘅pose，令唔少路過「同學仔」為之側目。之但係一影完學生相，新丁梁志祥竟然變身換咗套中山裝去開會，似足啲女學生，一放學就要換出街衫去「we wet」咁。梁志祥話，換衫係因為慶祝雙十節先變身；哈囉喂嚟緊，佢會唔會着南瓜衫開會？