滙控（005）經過早幾個月嘅洗黑錢風波後，近排成隻獅子生猛番晒，股價上月中仲升破70蚊創一年新高，行政總裁歐智華應該可以鬆一口氣，出嚟見吓人。據聞呢位舵手日前嚟咗香港主持滙豐銀行嘅董事會會議，仲計劃禮節性拜會新特首CY梁振英，之不過最終雙雄會安唔安排得成，華華就木宰羊喇。
歐總力撐東盟峯會
咁啱得咁蹺，歐總上次到訪香江，撞啱3月特首選舉投票，當時狼英雖然已經當選但仲未上任，今次如果有緣相會，應該都算世紀碰頭。呢幾日逗留喺香港，歐總就保持一貫低調，除咗前日出席東盟財長峯會午餐演講之外，就冇再公開露面，只係密集式開會同喺私人場合約訪VIP。今次東盟財長峯會，歐總畀足面致辭發言，除咗因為滙豐亦係活動贊助機構之一，華華聽講，獅子行認為呢個會議同環球銀行及資本市場嘅長遠發展至關重要，特別喺全球經濟不景氣下，東盟發揮嘅支援角色好緊要，所以點都要力撐。講開東盟，成員國之一嘅新加坡，亦係滙豐區內發展重鎮，呢個同香港並稱亞洲雙城嘅金融中心，誓要成為區內資產及財富管理中心，佢哋打造嘅新金融地標─新加坡濱海灣（Marina Bay），話要媲美倫敦金絲雀碼頭同紐約華爾街咁架勢，好多重量級銀行好似渣打同巴克萊，已經將原本位於萊佛士坊嘅獅城總部搬咗去濱海灣，唔知歐總今趟有冇去埋觀摩，搬埋個當地總部去呢個新地標呢？李華華mailto:[email protected]