踏入10月，秋意漸濃，又係龍友嘅影相好季節。秋天影紅葉固然係Perfect，但走遍世界大江南北，又熱愛攝影的李純恩對「秋色」更具獨特見解，認為「黃更勝紅」，除黃葉更有豐富層次外，秋天感亦更強。問到「攝秋」秘技，他更提議各位多看詩畫，能有助自己選材構圖更富詩意，確係有道理喎！
記者：韓繼聰、許褔合、陳國輝
攝影：周旭文、蔡家輝、潘志恆
李純恩
香港著名傳媒人、作家，攝影經驗豐富，喜愛遊歷，加上得閒為旅行團帶團，世界不少靚景都被攝於其鏡頭之下。
九寨溝絕頂黃秋色
講起拍攝秋景，唔少人第一時間諗起影紅葉，但喺香港要影紅葉的確有難度，無計，細細個讀書已經知香港地少人多，莫講話紅葉，連靚啲嘅秋景都難搵。影遍世界各地的李純恩，就坦然話自己無喺香港影過秋景，那外地又有甚麼地方係攝秋勝地呢？李生話一定要去四季分明及有較多大葉植物生長的地方，除「秋色」夠明顯外，大葉的色彩亦更明顯。李生諗都唔諗就推介九寨溝：「九寨溝四季好分明，10月中剛開始轉凉，山坡最低的草仍有微綠，上一點開始轉黃，再上一點就是全黃及全紅的彩林，加上山頂上純白雪頂，及山下湖水的清澈透綠，色譜齊全，可以話係最斑斕的絕頂秋色。」真係齋聽都感受到景色的壯麗。李生話10月10至20日係影九寨溝最好時機，開始有紅葉，黃葉色彩亦夠豐富：「其實我唔喜歡單影紅葉，因為紅葉單色比較單調；相反黃葉的顏色變化更大，相對更有層次，金黃色亦更富秋意。」
山下雨 山上雪
想影有埋雪山的豐富構圖，首要條件當然係山上有雪。李生話最好喺雨後拍攝：「只要山下落完一場大雨，山上就多數會有雪，咁就可以影到我所講色譜齊全的秋色構圖。」
大阪御堂筋黃金大道
講到李生更愛嘅黃葉，不得不提日本大阪，他一講起已眉飛色舞：「有次去到大阪，整條御堂筋兩旁種滿銀杏樹，當時正值入秋，全部樹葉剛剛轉成金黃色，加上銀杏樹葉夠大且葉形靚，恍如置身一條金光大道，靚到不得了。」據他所講，11月尾至12月初係影呢條「金光大道」的最佳時機，當時遍地黃葉，秋意極濃。到夜晚，銀杏樹嘅金黃色更有如打咗燈一樣，各有各靚。問到最難忘的「秋景」，李生就講起20年前的美國之旅：「當年同朋友由華盛頓坐小型私人飛機到紐約，飛機喺一萬呎低空飛行，沿途一片黃葉紅葉，眼前景象猶如油畫一樣，簡直畢生難忘。」可惜事隔太久，當時拍下的照片已遺失，未能一睹李生鏡頭下的美景。
拍照秘技
第一招：睇詩畫豐富詩意
大家都知李生係文人雅士，估唔到攝秘技影都甚有文人風采。他說攝影其實好講詩意，影秋色更甚，所以多看詩畫，為自己建立更深厚文學根底，腦中多詩句，對構圖自然會有更獨到見解，作品背後亦更具詩意。而秋色色彩豐富，風格與西方油畫相似，多看對攝影取材及構圖亦有裨益，更易影出詩情畫意的美麗秋色。
第二招：晨光照金輝
好多人話成功無秘訣，只係靠勤力，李生對攝影有着相同見解：「要影靚相一定要勤力，特別係影秋色，早晨的陽光映照下，秋葉的金黃色會更出眾。」據李生講，原來45o射下的自然陽光最適合拍攝，雖然晨光與黃昏一樣係45o，但晨光比較強一點，光照下的景物會較Sharp，亦較有清新感，加上人少，無論影景、影黃葉定紅葉都較靚，所以一定要早起身，6點至10點影就最Fit。
第三招：一葉知秋
「一葉知秋」恍如武功招式的名字，其實係講構圖技巧。好多人都喜歡影漫山秋色，一大片黃葉紅葉海，但其實構圖中只有少量葉子，甚至只得一片葉，一樣可以表達深深的秋色詩意。就如李生其中一張作品，相中一整片碧藍湖水，細看下幾片黃葉漂於水上，反差甚大，簡簡單單卻讓人感受到不一樣的秋色浪漫。
第四招：f/8光圈先決
在拍攝實戰技巧方面，李生建議大家利用光圈先決模式拍攝，比較方便簡單，即使新手亦容易掌握。李生說個人偏好f/8-f/11光圈，認為這光圈範圍拍攝出來的感覺最自然，不太Sharp，亦有少許景深效果，可配合晨光拍攝之餘，亦配襯秋色的浪漫感覺。
必備器材
不少人都知李生係Nikon粉絲，一直都係用Nikon相機拍下不少靚相。近期李生嘅拍攝夥伴就係最新旗艦機D4，相質不用置疑，反應更係極快，唔怕錯失拍攝良機。鏡頭方面則多用AF-S NIKKOR 24-70mm f/2.8G ED，李生話呢支鏡夠Sharp夠清晰，加上色彩自然，焦距亦足夠應付一般拍攝，一支鏡輕便夠用。
貼士：帶衫帶電
雖說係秋天，但講緊嘅係外地，秋天溫度可能已經如同香港寒冬，尤其是李生鍾愛晨早出動，溫度更低，所以禦寒衣物唔少得。而在寒冷天氣下，相機電池亦較平常快耗盡，一定要帶更多電池喺身，否則錯失剎那靚景，真係喊都無謂。
Richard Lau
Richard Lau是位旅攝專家及攝影器材專家，熱愛數碼攝影，擁有超過10年自助旅遊攝影經驗。
10月中迎韓楓
Richard有多年拍攝紅葉的經驗，主要到韓國的雪嶽山、內藏山及母岳山等地點，通常選擇10月中到月尾的秋季，「韓國的南北氣候有所不同，要看到通紅的紅葉，時間相當難以預計。」除了氣候難以掌握，Richard說拍攝最困難之處是要找到合心意的拍攝地點，雖然出發前都會預先計劃行程，但好的「紅葉點」難求，往往要花長時間再加點運氣才碰見，所以拍攝器材方面，建議以輕巧為主。
拍照秘技
第一招：逆光拍攝
Richard認為只要掌握好光線的角度技巧，即使以普通的拍攝器材，亦能有好效果。他教一招易學上手的逆光拍攝，亦即背光拍攝，拍攝時可選擇面向陽光，光線打通樹葉，會起到通透的效果，最好選擇葉子密度較高的地方，新手拍攝盡量選擇特寫，不要拍得太Wide，構圖會比較容易掌握。在面向光源拍攝時，最好在鏡頭加上遮光罩。
第二招：CPL偏光鏡
Richard在拍攝紅葉為題的相片時，有時會加上CPL偏光鏡，主要作用是提高飽和度，按需要扭轉鏡頭調校角度，可令紅色的葉面更加火紅，拍攝出鮮艷奪目的相片。加CPL雖然有加紅的效果，不過亦有減光的缺點，需要提高一至二級快門，降低手持拍攝的穩定性，使用時要加倍注意。
第三招：井字構圖
Richard教路除了逆光外，亦可使用深黑背景以襯托突出紅葉，這時可考慮加入井字構圖的技巧拍攝。將畫面分成九格，形成一個井字，將作為主體的紅葉安排在井字交叉點或井字線上，可按景物位置分配，是較易上手的構圖方式。
必備器材
Richard最近使用Nikon D3s，在拍攝紅葉時主要配備三支鏡頭：14-24mm廣角鏡、24-120mm標準鏡及70-200mm遠攝鏡，按環境需要，有時還會加上增距器拍攝。Richard除了喜歡拍攝掛在樹上的紅葉外，還喜歡捕捉一些流水淙淙的紅葉相，需要以慢快門拍攝，這時就要出動腳架及電子快門繩。為免忘記拍攝地點，他會用上GPS定位器，可記錄拍攝位置資料，方便將來檢查。
阿包
人稱包Sir，是Sony Style的導師，同時亦身兼Bauhaus及小母牛攝影師。
日本箱根影山影葉
講到紅葉拍攝，包Sir最喜歡是日本箱根，除交通方便外，當地有好多地方能見到富士山，出現紅葉的地方亦較多；另外日本的京都及奈良亦是包Sir心水之選，也通常會選擇11月尾到12月初出發，不過包Sir建議：「出發前最好多了解當地天氣，尤其係葉子變紅的時間，即使當地人亦未必能掌握。」包Sir教路， 因為拍攝紅葉好受光源位置影響，拍攝時要考慮交通，避免錯過最佳的拍攝時間，包Sir本人就比較喜歡在近黃昏的四至五點拍攝。
拍照秘技
第一招：對角構圖
除了常見黃金分割，包Sir還愛使用對角構圖設計相片，利用斜線或對角線，製造出與別不同的視覺效果，在拍攝紅葉時，還可起到一定的層次感，簡單易用。包Sir亦指出幾個反面教材，如人像頭頂出現樹枝、光柱或割頭的情況，絕對不合格，不能出現。
第二招：暗黑背景
利用黑色背景來突出紅葉不難理解，不過日光白白，在哪裏找來黑色背景呢？包Sir教路要多利用角度，如利用附近建築物的陰影位置作為背景，就可以突出前景的紅葉主體。不過包Sir亦同時提到要留意樹葉的完整性，以黑背景襯托，爛葉會好顯眼，盡量避免。
第三招：手動對焦
拍攝時會使用手動對焦為主，主要因為能較好掌握對焦點，想要前景或後景都可以自己掌握，不過包Sir提醒玩家，光圈一般使用F5.6左右就好，大光圈景深過短，會影響相片銳利度。
必備器材
包Sir是多年的Pentax相機用家，近年愛用Pentax 645D，主要因為相片成像可高達4,000萬像素，拍攝紅葉時，主要會使用三支鏡頭：33-55mm廣角鏡、120mm Macro鏡及300mm遠攝鏡。包Sir亦提到如果環境許可，會自備梯，能走到水平或高角度拍攝，更容易利用現場光及建築物。另外，他亦愛拍攝人像，所以亦會帶備反光板，主要用來替人像補光。
出發前 睇實紅葉App
《日本紅葉》 iOS $8
即使短期內未能親身去拍攝紅葉，可以先下載App 《日本紅葉》，作者遊遍日本，拍攝很多日本紅葉和風景靚相，慢慢品嘗。
港產紅葉景 大棠最靚
專登飛去加拿大、日韓為紅葉拍攝寫真，聽落都幾奢侈！想慳錢又方便，港九新界一樣搵到。經常喺網誌發表攝影作品嘅Dickens，就推介幾處紅葉靚位畀大家，佢話全港最多、最密嘅紅葉景，首選一定係元朗大棠！「喺自然教育徑附近，佈滿好多三瓣形紅葉，叫楓香，雖然樹木嘅身材矮細啲，但生長茂盛，影出嚟嘅效果特別壯觀！而城門水塘及嘉道理農場，則搵到比較高大嘅紅葉樹，不過較為分散；至於最常去睇螢火蟲嘅大埔松仔園，勝在交通便利，由市區搭一程巴士就到達。」
但影靚相仲要夾啱時間，Dickens話每年12月至1月初就最適合影紅葉，尤其聖誕幾日，人特別多，更有氣氛。至於選擇朝早抑或黃昏拍攝，由於光源照射位置不同，例如正光、側光等，分別都好明顯。
網址： http://www.facebook.com/visiona.photography