今年業績喺全線內地體育股中衰到貼地嘅李寧（2331），為咗走出谷底，除咗早前引入TPG基金股東諗住改善營運策略外，亦繼續搵明星幫手，噚日佢哋宣佈揮低Nike，成功簽到上屆NBA總冠軍熱火球員獲迪（Dwyane Wade），終於有個撐得起招牌嘅國際巨星。
中期盈利 隨時畀晒獲迪
李寧呢個品牌本身知名度高，但因為品牌定位策略失敗、囤積存貨等問題，搞到公司喺同行之間表現最差。
主席李寧前排話過要改革品牌，估唔到咁快就做到嘢，簽到幫熱火贏得NBA總冠軍嘅獲迪做代言人。李寧話會好似「波神」米高佐敦咁，推出「Wade」系列波鞋，相信對公司籃球品牌業務好有幫助咁話。
獲迪打NBA時一直都係同Nike旗下嘅Jordan品牌簽約，每年代言費用超過500萬美金（3900萬港紙），聽講李寧今次畀獲迪嘅代言費有增無減，即係4000萬港紙走唔甩，但公司8月先至發完盈警，呢筆代言費隨時多過今年中期賺嘅4430萬人仔喎。不過小財唔出，大財唔入，又睇吓李寧呢鋪可唔可以贏番個市場冠軍番嚟嘞。