民主黨胡志偉由區議會殺入立法會，猶如幼稚園升小學一樣咁雀躍，但係佢冇因為升呢而變得財大氣粗，生活習慣冇咩改變。喺黃大仙默默耕耘多年嘅佢，成日喺區內以單車代步；今次升班過海去立法會「返學，佢都堅持踩單車，由黃大仙「踩入」添馬艦……即係拎埋部單車搭地鐵，再喺金鐘地鐵站踩去立法會啫。
大力推展低碳生活
雖然金鐘地鐵站一出過天橋就到立法會，行路好似仲快，但原來話呢架車並唔只用於咁短路程，事關志偉已決定將佢變身「港島專車」，第時港島區有咩活動，佢都盡量踩單車出席，身體力行推展低碳生活。佢大呻早前試過由灣仔踩去立法會，發現要兜好多路，希望政府整番條單車徑。網民Like爆志偉嘅單車英姿，但就提醒佢安全至上，最好戴番個頭盔先囉。