現代人都是低頭族，whatsapp、微信，溝通最緊要快。丁子高和謝婷婷前晚出席活動時，卻坦言愛寫浪漫情信，丁子高寫足一盒情書追楊千嬅，更爆大笑姑婆千嬅其實寫信有很難測的詩意，要反複細味才能意會，他又謂月底復出的千嬅，近期一周運動六日操弗自己，卻遭兒子整蠱。
丁子高、楊千嬅、羅霖、馬詩慧和楊汀叮等，前晚在尖沙嘴出席名筆活動。講開寫字，丁子高直認會寫情信：「不嬲都有寫，拍拖時，有啲講唔出口嘅咪寫囉。」他指寫完情信，千嬅也很enjoy回信，他笑笑口說：「佢都好鍾意寫，佢嘅文字比我更加好，要睇幾次先領會到，我寫嘅信都儲埋一盒。」丁子高更向老婆表明專一，表示舊情人、前度的情信和照片等，在結婚時已全部丟掉。
餵奶唔肯飲
提到囝囝，丁子高指兒子近期整蠱千嬅：「佢之前飲奶好快，呢幾個月就玩千嬅，千嬅餵就唔食，工人、陪月餵就食，整蠱媽咪。」他透露千嬅月底復出，正積極修身：「我一個星期運動四日，佢就六日，嚟緊都有啲代言、廣告會做。」更指相信到時千嬅一開工，肯定掛住BB，要傳短片安撫。
謝婷婷一樣愛寫信，男友安志杰（Andy）寫給她的第一封信，是一張用隱形墨水寫的聖誕卡，她一直珍藏：「會寫畀Andy，但我寫得最多其實係畀媽咪（狄波拉），我係會用五個鐘頭起稿、構思再去寫。」
婷婷講義氣
不過寫給兄長謝霆鋒的信，婷婷卻一直沒寄出，她說：「有張卡係寫畀阿哥，但14年嚟都未寄出，因為好多嘢寫，寫滿咗張卡都唔夠，唔知點。」她約滿王晶後，有傳撬走舊公司同事，惹王晶不滿，婷婷說：「冇咁嘅事，你問晶哥，大家都係有義氣嘅，唔會。」又指仍未決定簽約那一間新公司，為此無形壓力更失眠。
採訪：顏英儀
攝影：黃偉雄