近期全球熱捧《江南style》，而近日體壇就興「中國style」。講緊嘅係一班網球巨星包括費達拿、迪祖高域同梅禮，到上海打大師賽，費天王賽前收到死亡恐嚇，所以去到邊都咁大陣仗；另一邊，NBA球隊熱火同快艇就喺北京同上海打季前熱身賽，熱火大軍更暢遊名勝頤和園。
熱火雖然喺季前賽第一場，以79:92慘敗喺鷹隊手上，但無礙全隊人去中國嘅興奮心情。飛機抵達北京之後，一班人放低行李，就去咗參觀頤和園。面對美味到不行了嘅中國菜，「大帝」勒邦占士告誡隊友，唔好亂食嘢！咁又真呀，北京有填鴨，上海有小籠包，食到重咗幾磅就唔好。
獲迪復出明鬥快艇
不過，熱火球員要出去王府井大街，或者去外灘玩都幾難；因為佢哋今次行程都幾緊密，周四對完快艇之後，下周日就要飛去上海對多一次，中間空出嘅幾日，大部份時間都係練波，真係冇乜時間出街。雖然如此，「大帝」依然覺得中國之行對球隊係件好事：「應該會好好玩嘅，大家全程都會喺埋一齊，所以我哋會好好利用呢個機會，去加強默契。」（now635台明日7:30pm直播熱火對快艇）
今季轉着李寧牌波鞋嘅獲迪，就為中國球迷帶嚟喜訊。內地傳媒爆料，話呢位得分後衞會傷癒復出打中國賽，每場最少都會落場10分鐘。而佢到埗第一日，仲同咗個好似南韓肥叔歌手PSY嘅球迷影相，仲上載上Twitter！另外，早前有傳會轉戰CBA嘅麥基迪，周二驚傳佢已經同意加盟青島隊。不過，家只係同意，仲未簽紙，所以真假依舊難料。