市況好，各類股份只要夠大路，就會輪流炒上。之前投資者睇死環球經濟唔得，工業股一定唔掂，點知瑞信發報告，話建滔積層板（1888）嘅9月產量回復雙位數增長，即與建滔化工（148）一齊爆升，加埋市傳新嘅成品油價格機制即將出台，化工股又升到嘭嘭聲，大家睇死嘅股，原來都可以升得咁勁。睇嚟一批大家都唔多信會掂嘅股份，都有可能陸續炒上，就算基本因素唔夠好，都有低估值搭夠，試問市賬率0.6倍同0.5倍有乜分別？但對股價嚟講，短線就隨時有接近20%上升空間。馬鞍山鋼鐵（323）基本因素爛得嚟估值極殘，市賬率約0.43倍。事實上，鋼鐵股呢個Sector真係冇人信，死症係鋼價升，鐵礦石價就會跟住升，而鐵礦石價格一直跑贏鋼價，令利潤率一路收窄，所以鋼鐵企業蝕錢容易賺錢難。今年鋼價同鐵礦石價格同時插水，令礦商以至鋼鐵企業都唔好過。大行中搵間睇好馬鋼都唔容易，全世界睇淡呢個Sector，股價係咪一定死梗？又未必。9月內地鋼鐵業採購經理指數（PMI）連續5個月低於50盛衰分水嶺，即係仲收縮緊，但指數由8月份嘅39.9升到去43.5，其中新定單嘅PMI由32.2升到41.6，反映收縮速度減慢。9月鋼價就反彈7%至8%，原材料鐵礦石價反彈到每噸100美元以上，令生產鋼鐵嘅邊際利潤跌到去每噸163美元，而行業產量就繼續下滑，即係第三季經營環境仍然惡劣。
短線上試2.2元
馬鋼第三季以至全年都有機會發盈警，但負面消息已喺股價反映。未來鋼價表現，就係影響馬鋼股價嘅最關鍵因素，如果認為內地經濟將出現起色，鋼價始終有條件反彈，馬鋼都唔係冇上升嘅條件。睇圖嘅話，馬鋼嘅中長線技術走勢相當唔錯，9周RSI由5月至7月形成咗雙底背馳，9月突破咗周線圖保歷加通道中軸之後，連續4周守穩中軸以上。睇番日線圖，馬鋼嘅成交喺8月開始略為活躍，9月初至今嘅股價相比另一鋼鐵股鞍鋼（347）同煤炭股中煤能源（1898）更強，如果淨係睇圖，其實有晒理由買入博反彈，短線可以博佢上試2.20元。晉佳本欄逢周一、三及五刊出