撤同唔撤之間，身為開展德育及國民教育科委員會主席嘅胡紅玉Anna揀咗「擱置」，算係暫時平息一場政治風波，等狼班子可以唞吓氣。唔少政界中人話國教風波紅咗黃之鋒外，Anna亦喺政圈人氣急升，同《江南Style》嘅騎馬舞一樣咁爆紅，近期有傳佢係中央可以接受嘅下屆特首黑馬，唔排除有機會做香港特區首位女特首㖭呀。
過咗阿爺信任嗰關
嘩，Anna有乜咁巴閉令阿爺刮目相看？乜佢唔係港英餘孽咩？嗱嗱嗱，唔好話八方馬後炮，查實早喺Anna當年成功出任汕頭大學法學院顧問時，八方聽聞佢已成功洗底，否則阿爺點會批准佢殺入內地？相信信任測試呢一關，Anna已經過咗。
除咗阿爺撐，Anna亦係超人李嘉誠嘅好朋友，單係呢點已經夠贏。有政界中人話，唔好忘記Anna自己都夠晒「哥利」，尤其國教風波反映佢觀眾緣唔差，最後話擱置，更加成功拆彈，得到唔少民心，另外佢同泛民有偈傾，更加係優勢，因此近期行情突然急升，唔少人貼佢係下屆特首黑馬，因為阿爺聲稱2017年要普選特首，梗係要搵個有泛民色彩嘅人襯托陪跑。咪以為陪跑一定冇運行，由死硬入閘到坐正，狼英有辦大家睇。
mailto:[email protected]