早前有日本毒男教人點樣自拍「扮有女友」，即係影到自己甜蜜笑容同埋枱上兩杯飲品及女性用品，但「女友」就怕醜唔出鏡，呢招為毒男帶嚟無限希望。近日再有兩種深造手法出現，分別係扮同女友抱抱親熱，同埋變身成功人士九招。
沐浴喺愛河中嘅男女，情到濃時忍唔住要抱抱，少女將頭深深埋喺男友嘅胸膛，只係露出一頭長髮……原來一個假髮就可以做到咁嘅效果。毒男可以走到街頭死角，一手頂起假髮放喺膊頭位，再用另一隻搽咗粉色指甲油嘅手自我擁抱，喺後面影埋去就似兩個人攬住，恨死dry爆男。
想做成功人士仲容易，只要買齊道具搵啱地方，就可以冒充係豪宅主人、運動金牌得主、豪買名牌等等，總之諗得出扮得到。不過呢啲始終都係呃人招數，想脫離「毒海」，最好將呢份心思變成動力，只要發奮上進，自然會成為吸引女性嘅成功人士。
