中環OL早幾個月日日「岳」高頭睇美國時裝店A&F肌肉型男，型男走咗一排，大家返工、放工、食晏回歸平淡，呢個星期又開始有嘢睇，但今次要低頭睇，係睇畫咗公仔嘅煤氣蓋。
150個煤氣蓋分佈全港
煤氣（003）為慶祝150周年，仿效日本好興嘅井蓋藝術，搵10位市民、11位人氣設計師同插畫家，畫咗21幅同煤氣有關嘅畫，鋪咗喺全港街道150個煤氣蓋上面，尖沙嘴放得最多，中環心臟地帶亦有唔少。大家以後行街望地下，可能就會無端端見到麥兜、聾貓、馬仔、Chocolate Rain同Carrie Chau嘅作品。呢150個有畫嘅煤氣蓋係會一直擺落去，工人已經塗上一層特別護理嘅油，唔知有冇日本嗰啲咁襟呢？如果真係俾人踩到甩色或者抵受唔住日曬雨淋，煤氣公司先再睇吓點樣修葺喎，呢啲井蓋要特製鎖匙先可以打開，唔會咁易俾偷鐵黨有機可乘。
仲有邊度有「蓋」睇？
香港會：ROBOT中港城：麥兜太空館：Carrie ChauThe One：Maggiemarket註：只列部份，詳情請睇煤氣網頁