英國跳水之星戴利喺倫奧後，去咗放大假，之後就冇乜聲氣。其實佢近日為咗世界青年跳水錦標賽，喺澳洲積極練水備戰。佢遲啲仲會去中國，出席商業活動；到時如果晒出一身嘅肌肉，一定引死女粉絲！
戴利日前為咗今個星期舉行嘅世青賽備戰，練習10米台；喺高台上，佢以為冇咩人會望到佢，肆無忌憚喺台上面整理佢條緊到不能再緊嘅泳褲，但就喺呢個時候，喺佢下身突然爆出一道金光！就好似你細個睇《富貴逼人》嗰時，肥姐同驃叔打開本紅簿仔，多錢到發出金光咁，唔通戴利都有隻金雀？唔係，其實只係咁啱個射燈喺正佢後面，為小戴利打燈，先可以有咁嘅效果。女fans可以見到呢一刻，真係要讚吓攝影師。
到阿德萊德曬太陽
比賽再重要，都要忙中偷閒；所以識嘆嘅戴利仔，就同幾個隊友去咗世青賽舉辦城市，阿德萊德嘅一個沙灘曬太陽。賽事結束後，佢唔會返英國住，會先嚟中國為商品做promo，之後再去放假。學業同事業都要兼顧，戴利話完全冇問題，仲想踩多腳入娛樂圈：「家仲讀緊書，不過我都好想做電視節目主持之類嘅嘢。」