北京有熱火同快艇，上海方面亦唔輸蝕；今屆上海大師賽除咗泥地王拿度因傷冇份參戰外，其餘3位世界排名前4嘅巨星都會現身。瑞士天王費達拿「被迫」成為焦點，因多得強國網民喺網站發出死亡恐嚇搞事，令到佢周二練波有成班保安圍住；費天王今晚8點後會喺次圈登場對中華台北盧彥勳。
迪祖望喺中國起孖
「2哥」迪祖高域亦積極備戰，務求喺中國公開賽後，贏埋大師賽，進一步收窄佢同費達拿喺積分上嘅差距。但一向好有自信嘅佢，唔知係咪因為今年表現勁跌watt，唔多睇好自己今年重做「1哥」嘅機會。佢話：「贏中國公開賽梗係幫到我啦，不過家離第一仲有段距離。」佢喺今午就會同保加利亞嘅迪美杜夫交手。
至於喺美網擊敗迪祖，奪得球員生涯第一個大滿貫錦標嘅英國球手梅禮，出席咗賽會舉辦嘅活動。佢仲大玩中國傳統工藝剪紙，搞到佢要自嘲：「剪紙仲難過打美網決賽！」但佢同傳媒講自己今年好難做到「1哥」。
力求3連冠嘅梅禮，今日將會喺次圈對德國嘅美亞，如果一路順利，4強就要硬撼費達拿。（now636台今日2:00pm起直播）