恒生銀行（011）喺中環中建大廈間分行做咗十幾年，明知業主有意大幅加租，先發制人今年初開始搵地方搬，今年12月就會搬去陸佑行，業主許世勳家族旗下中建企業亦嗱嗱聲攞個舖出來放租，叫緊300萬，比恒生家份租約多1.7倍。
較舊租約貴1.7倍
聽講中建企業早排已經攞個舖位出來放租，呢個地庫舖位面積約8500平方呎，業主開價300萬，即係呎租350蚊左右，相對地面舖呎租要過千蚊，呢個地庫舖又有自己門口，都算係筍舖。家陣皇后大道中啲舖租升到「嘭嘭聲」，地舖最新成交呎租要1500至2500蚊，中建大廈呢個地庫舖叫緊呎租幾百蚊，業主都算係好克制㗎喇。就因為租貴，恒生先要搬到去陸佑行地庫開分行，呢度呎租只係113蚊，不過地方細過中建大廈，所以唔做保險箱服務，箱戶要搵地方搬。