導演陳翊恆（Daniel）最近獲王晶賞識，搵佢重拍當年經典嘅《古惑仔》電影系列，其實陳翊恆之前都拍過兩部片，一部係上映緊嘅《第6誡》，另一部係即將上映由溫碧霞、陳偉霆主演嘅電影《紮職》。
不過講起《第6誡》，導演陳翊恆就有啲唔忿氣，事緣部片嘅劇本原名《天馬行凶》，兩年前喺韓國富川國際奇幻電影節贏咗個劇本評審大獎，之後仲拍成電影，一個導演最開心自然係見到自己作品面世；不過拍嘅時候陳翊恆都諗住呢部係港式電影，點知拍完出嚟老闆話要變合拍片，仲搵咗個內地導演係咁意補咗幾場戲就算。
陳翊恆早前入戲院睇咗部戲後，接受電話訪問時話：「好似睇緊當年李小龍死咗之後，補拍嘅電影《死亡遊戲》咁，啲日頭夜晚、光暗位全部錯晒。」
已向導演會投訴
最令陳翊恆唔甘心嘅係自己作品無端端加咗老闆同一啲唔相關嘅人名落去，好似共同創作咁，電影被合拍，導演已經喺自己嘅微博將件事講咗出嚟，連彭浩翔導演都話如果事件屬實，就真係好唔尊重當事人。陳翊恆話已經向導演會投訴，不過自己仲未係會員所以只可以備案。《第6誡》上周四上映截至前日票房都係得36萬左右。