梁振英月前宣佈，六十五歲以上長者，若通過跟現時一樣的入息及資產審查，明年一月起可領取每月二千二百元生果金，較現時多一倍，並可追溯至今年十月。沙膽虹覺得這樣增幅已經超大方，怎料各界都話唔收貨，要政府取消入息及資產審查，令所有長者受惠；或者是提高入息及資產上限，令更多長者受惠，又話要入息及資產審查就係唔尊重長者，漠視他們對香港的貢獻。沙膽虹覺得咁講真係豈有此理！須知道這個特惠生果金是希望幫助真真正正有需要的長者，並非政府有錢冇碇使要亂咁派，有入息及資產審查亦好應該，難道唔派二千二百元給李嘉誠或董建華或劉遵義，就漠視他們對香港的貢獻？至於入息及資產審查在哪一個位落墨，則按照原來生果金規矩有何問題，即單身人士收入少於六千六百六十元及資產少於十八萬六千元，有配偶的月入少於一萬零五百二十元及資產不多於二十八萬一千元，即使暫時超越此數的長者，一旦收入或資產低於此數，就馬上有這個安全網！香港雖然有六千多億財政儲備，但若然政府洗腳唔抹腳，生果金花一百多億，其他再東花西花，都唔夠多花多少年，一旦遇上經濟大衰退，賣地或各方面稅收不濟的時候，就更快乾塘！沙膽虹