過去幾日灣仔會展附近酒店同中環文華酒店都好好生意，事關蘇富比同內地最大拍賣行中國嘉德齊齊舉行拍賣會，吸引大量買家來港，君悅同文華一間普通房嘅房租去到4000蚊樓上一晚，比淡季升十幾個巴仙，仲未計佢哋留港其他消費，真係唔可以睇小一個拍賣會對香港經濟嘅推動力。呢輪拍賣會之所以惹人關注，原因係首次有中國拍賣行喺海外獨立舉行拍賣會。中國嘉德1993年成立，全球排名第四，董事總裁王雁南係已故中共前總書記趙紫陽個女，背景唔簡單。
嘉德豪氣 包房百間
嘉德周日喺文華舉行拍賣會，現場所見有過百人參與，人頭湧湧逼到爆，唔講仲以為係旺角派米，聽聞嘉德為買家喺文華預訂100間房，佔總房數四分一，文華認真要多謝佢。翻查資料，文華酒店同拍賣會好有淵源。有268年歷史嘅蘇富比1973年已經來港設立蘇富比辦事處，亞洲第一場拍賣會正正就係喺文華酒店舉行，自此奠定香港業務根基。嘉德揀文華做首場拍賣會，唔知係咪參照呢段歷史，亦都想嘉德將來發展到好似蘇富比一樣呢？嘉德今次在港小試牛刀，319件中國書畫同39件古董家具以4.55億成交，係估價嘅2.5倍，成績相當理想，嘉德亦已計劃每年定期來港舉行春秋兩季拍賣會。
春秋二拍 消費強勁
照咁睇，港人以後除咗要關注「五一」同「十一」黃金周，內地旅客來港消費情況，更要留意呢類拍賣會，事關來港參與拍賣嘅買家先係真正高消費人士呀。mailto:[email protected]
