傑志繼今夏重金邀請英超勁旅阿仙奴訪港，成功逼爆大球場後，呢支本地老牌球隊噚日公佈，已經獲特區政府嘅盛事基金撥款資助，邀請英超班霸曼聯，出年夏天嚟香港同傑志踢表演賽；估計賽事成本要成2,000萬港元。
近年有唔少歐洲勁旅訪港，而喺香港有大把擁躉嘅曼聯，對上一次嚟已經係05年嘅事；當年紅魔隊內有史高斯、雲尼斯達萊、朴智星同朗尼等球星，仲以2:0擊敗港隊。不過因為賽事成本高，所以貴價飛賣到1,200蚊，最平都380蚊，結果賽事失收，得33,971名球迷入場。
盛事基金資助約800萬
其實曼聯為搵銀，每季季前都拉隊去亞洲同美洲踢熱身賽，我求大俠收到風，曼聯上季都有興趣嚟香港，只係每場戲金盛惠200萬美元，折合超過1,550萬港紙，連埋酒店、食宿、機票同場租等，成本超過2,000萬，以大球場坐得40,000名球迷，貴飛點都要過千，否則實蝕；咁大條數，難怪05年後冇再嚟。
傑志總領隊伍健噚晚話，其實搵阿仙奴嚟前已經同曼聯傾過，但因某啲原因唔成事，最後先搵阿仙奴，而兵工廠令大球場爆棚，扣除成本有近400萬收入，幫補到佢哋興建賽馬會傑志足球中心嘅經費後，自然要同曼聯接洽。
伍生話：「得到盛事基金撥款出唔多於800萬港元資助，可以減輕出年8月請曼聯嚟嘅成本，而且曼聯咁多年冇嚟，今次都好想訪港；現階段仲係同曼聯傾緊合約，只可講曼聯出年嘅季前集訓，係有計劃嚟亞洲，包括香港等地，希望未來幾個月落實，暫時就未諗到票價呢個問題。」
紅魔波衫全球最賣得
伍生話如果搞得成，賽事部份收益會繼續投放喺足球中心同免費培訓精英球員，另外佢哋亦會同旅發局合作，希望透過呢場波吸引外地旅客。
講開又講，曼聯一向都係全球最受歡迎嘅球會，體育市場調查公司sportingintelligence.com周二就發表報告，統計07/08球季至11/12球季全球足球會波衫銷售量，曼聯同西甲嘅皇馬就以平均140萬件並列第1；前10嘅球隊都來自4大聯賽，巴塞排第3，都賣過百萬件，英超就有4隊打入10大，第4有車路士，利物浦同阿仙奴分列6、7位。
