港股成交依然弱雞，搵食艱難，有證券行推出股票分期供款計劃，先畀三成錢，餘款連孖展息每月分期還，買入價就以供款首日計起。唐牛就覺得，分期買股票嘅人，一定唔係日日落場炒，倒不如幫襯銀行月供股票仲好，起碼唔使借錢炒股，加上以平均價入市，有助降低風險。煤氣（003）日前透露，已取得首個頁岩氣項目，未來新能源業務發展成熟後，更會分拆上市。神州大地亦蘊藏大量頁岩氣，早前引入外資猛人嘅天然氣鑽井設備股安東油田（3337），有望借助先進技術，搶食頁岩氣頭啖湯。事實上，安東油田業績亦突飛猛進，中期多賺1.5倍至1.25億人仔，年度化市盈率只係13倍，以增長股嚟講絕對超值。阿爺近期頻頻進行頁岩氣探礦權招標，倘項目踏上正軌，安東油田盈利肯定以幾何級數上升，屆時市盈率隨時重返單位數字；現價1.90元吸納，升穿今年高位2.03元再加注，博破位海闊天空。唐牛