黃金周曲終人散，大行紛紛出報告幫零售股埋單計數。德銀、美林及高盛均指黃金周銷情弱雞，可見強國經濟放緩的影響已殺埋身，搞到內需股（特別係百貨股）昨日全線仆直，不過，龍頭中國旺旺（151）就獲高盛「特別關照」，認為其前景一片大好！點解？聽吓佢點講。高盛睇好中國零食、糖果及酸奶市場，相信會有可觀的增長潛力，根據Euromonitor數據顯示，相關行業的規模將由2011年的330億美元，大幅增至2017年的700億美元，即係6年市場可以翻一番。該行指出，零食業於消費品股中的毛利率最高，行業集中度又較低，意味強者有空間搶得最大市佔率。在此環境下，旺旺勢將受惠，並可鞏固其市場領導地位，目標價由10.10元調升至11.85元，評級由中性上調至買入。
目標價PE高達28.8倍
報告最「爆趣」之處，在於將賣零食的旺旺歸類為「消費必需品」，好似人人都要食零食咁。在如此分析基礎下，估值自然可以高好多，目標價（11.85元）相當於明年預測PE達28.8倍。環顧中資股，目前PE得10倍8倍的股份一地都係，加上經濟隨時硬着陸，內需又谷極唔起，值唔值得貴咁多買旺旺？高明有點懷疑，「停一停，諗一諗」，本欄宣判：暫時都係唔跟住！高明 http://www.facebook.com/AppleKoming