退休大賓架鄭海泉近日喜事臨門，添咗一個外孫女，鄭太開心到不得了，喺醫院，喺屋企睇到實晒，阿鄭唯有一個人出席慈善餐舞會，笑到四萬咁口，接受一眾老友祝賀。
有咗外孫女之後，不少朋友嘅生活規律都會改變，爭住去抱孫。中年會計師T幾年前初抱麟兒，以為生活一切如常，點知唔係噃。一位著名幼稚園嘅校監知道佢太太生咗個仔之後，立即打電話俾佢：「唉吔，乜你唔早啲通知呀，出咗世我先知道，怕趕唔切噃，你快啲補番張申請入學表俾我啦。」會計T聽到一頭霧水，一時之間，唔明校監講乜。再經解釋，先知道別人老婆懷孕兩個月，已向嗰間幼稚園遞表，為未出世嬰兒排隊申請等入學，而校監與會計T係多年朋友，識於微時，會計T竟然唔知規矩喎，反而令到校監心急㖭。
會計T明白後，一笑置之，佢自己係細路之時，都唔識乜嘢係英文幼稚園，玩吓玩吓咁就一路順風，一路升班至讀完大學做埋會計師，故此覺得讀書使乜咁緊張呀。佢將呢件事講咗俾表弟聽，點知表弟記在心中，一星期後就打電話俾佢：「表哥，我老婆今日做檢驗，知道有咗，你快啲介紹校監L俾我識啦，唔該幫幫忙！」會計T不得不勉為其難，做吓中間人。以後就不敢再向朋友提及自己與校監嘅關係。
不知從那時開始，香港時興一句，「不要輸在起跑線上」。左丁山不敢苟同，短跑飛人保特經常起步脫腳，落後一兩個身位，跑到五十公尺就發揮凌厲後勁，一衝而過。人生係長途賽，在起跑線輸一兩個身位，有甚麼大不了！與餐飲M講起呢啲嘢，佢哈哈大笑，因為佢自己中五會考曾失手，中六就從香港華仁轉去新法書院，咪一樣入到港大，與華仁同學在陸佑堂見番面！餐飲M話：「左丁山你讀嗰間中學仲渣過新法，確係唔使有名校焦慮症嘅！我依家就為明年餐酒價格擔心焦慮！西班牙、意大利受天旱影響，橄欖大失收，十一月份橄欖油、平價餐酒來貨報價升咗四至七成，升咗咁多，明年生意必受影響！」咁就煩咯，加埋美國中西部大旱，玉米黃豆價格已升咗好多，明年食物通脹會高到不得了，餐廳食肆唔大幅度加價先至奇怪，而加價又會趕客呢。