新鴻基證券創辦人馮景禧左右手馮家彬仔大女大，其中志煒（Victor）同穎琪（Vicky）兩個最近有新搞作，已為人父母嘅佢哋好明白家長緊張子女嘅幼兒教育，Vicky又身為唱作人，年初決定同Victor合作搞音樂playgroup，籌備咗幾個月，11月中開業，Vicky應該會整教材同課程。
投資幾百萬 學費300蚊
呢個playgroup叫做RockABaby，兩人投資幾百萬喺上環一幢商廈租咗個接近5000呎嘅地方做學校，請來一班音樂人做導師，六個月大嘅BB已經可以報名，主要用音樂同舞蹈啟發BB潛能同學習興趣，一堂學費大概200至300蚊，都算係市價。
Vicky另一個身份係律師，又做過昊天能源（474）董事，但喺金融界唔多人識，反而喺樂壇頗有名氣，天后鄭秀文96年唱到街知巷聞嗰首《放不低》咪就係佢作曲囉，Vicky至今已經有過百首作品出街，早幾年亦推出過個人創作專輯，近年佢主要湊仔同搞音樂，個仔都6歲喇。
Victor就同阿爸一樣從事金融業，有個4歲嘅仔。老實講，呢個年代，好多家長不惜工本畀BB上playgroup，體能、音樂、演講乜都學一餐，市場咁大，真係一門好有潛力嘅生意，加上馮穎琪嘅名氣，不愁客源，佢哋果然係來自投資家族！
mailto:[email protected]
