咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
咖喱篇
曼聯呢場贏紐卡素3:0，好多球員都俾人讚，但有個球員就俾人鬧，佢就係韋碧克。除咗上半場門前失機之外，佢喺進攻方面都冇咩幫到手，但其實呢個唔係今場波先有嘅問題；由開季到家，韋碧克都仲係未開齋。不過，諗番佢呢幾場嘅表現，令我想起前利物浦前鋒古積特。古積特係現今球壇少有嘅防守型前鋒（Defensive forward），特點係非常勤力，滿場飛，作為球隊喺前場嘅防守屏障，射門同入波反而唔係佢嘅主要工作。因為韋碧克今季喺進攻嘅參與度都唔太高，所以我就去搵吓數據，睇吓韋碧克係咪被安排打防守型前鋒，以致入波少咗咁多。韋碧克今季聯賽場均1.7次射門，仲少過中場嘅湯卡華利，而佢上季場均係有2.7次射門，所以明顯地呢位前鋒今季嘅位置冇咁貼近龍門。再睇防守，韋碧克簡直拍得住班後衞，佢場均攔截2次，排全隊第5，比卡域克同史高斯呢啲中場仲要多；至於截斷對手傳球次數，佢場均都有1次，排全隊第6。喺兩項防守數據上，佢都係表現最好嘅曼聯前鋒。韋碧克打防守型前鋒，好可能係因為尹佩斯同香川真司嚟咗，佢哋進攻好，但防守麻麻；如果佢哋一齊出場，曼聯的確要其他人多啲返後幫手。另外，艾舒利楊格受傷，左翼冇人踢，加上艾拉又係攻強守弱；如果韋碧克打偏左嘅位置，無可避免要做多好多防守工作。韋碧克今季嘅轉型係形勢所逼，但呢個改變係對佢好定唔好，就真係要繼續睇落去。