盧海鵬、賈思樂同林建明擔大旗嘅舞台劇《蝦仔爹哋》舊年9月做咗4場叫好叫座，因為個劇幫「心晴行動慈善基金」籌款，劉德華、鄭秀文同陳奕迅等巨星都無條件做串星，令觀眾睇得開心又驚喜。
今年《蝦仔爹哋》再接再厲，12月喺九龍灣國際展貿中心再做4場，仲傾緊去馬來西亞同美加巡迴，今次演蝦仔個仔蝦毛嘅，由陳奐仁變成金剛，廣東話笑死人嘅金剛加埋鵬哥肯定爆笑！
相信觀眾都好想知道今次會唔會有巨星串演，今次部份收益會捐畀曾志偉搞嘅福幼基金，佢一班明星足球隊老友已經舉晒手話客串，相信要睇到譚詠麟、許志安同黃日華等人一啲都唔難。
新蝦毛金剛噚日同小儀、黎耀祥喺荃灣拍《街坊廚神食四方》外景，今次祥仔係因為同金剛合作過而答應做嘉賓，祥仔話呢排放假仲忙，成日做唔同節目嘅嘉賓，不過正好為台慶劇《大太監》谷宣傳，有助劇集成為今年收視冠軍。
小儀再攬鎮宇
另外，小儀上月夾硬攬實《衝上雲霄II》嘅拍檔吳鎮宇影相，兼擺《亂世佳人》甫士，成功見報，噚日佢重施故技，仲着埋Lolita裝色誘鎮宇。只見鎮宇當時瞇晒眼，相信已經嚇到暈低！
