《跑馬地→中環》
現年35歲嘅台灣女星安雅最令人印象深刻係02年因為食搖頭丸而勒戒，星途險毀於一旦，近年安雅已經轉戰到內地拍戲，但事業發展都唔多順利。上周六下午4點幾，着住黑色鬆身裙嘅安雅，同一名中年男子現身跑馬地，只見久未露面嘅安雅暴脹咗兩個碼，上圍更連升兩cup，激爆上圍不時洶湧而出，加上身形肥腫難分同雙腳水腫，同以前嘅性感形象判若兩人。
陀B五個月
原來安雅身邊男伴來頭不小，佢名叫孔眾係孔子第78代直系後人，兩人拍拖已九年，今年3月安雅曾喺微博透露恨嫁心聲，雖然唔知佢兩個結咗婚未，但見佢哋全程如老夫老妻，相信感情十分穩定。而安雅見到記者亦大方點頭微笑，並直認已懷孕五個月，孔眾對佢亦照顧有加，不時緊拖住安雅，認真體貼。
兩口子之後去咗中環購物，買咗個BB相架，又去咗街邊攤檔買鞋帶，孔眾又陪安雅到一間賣印度衫嘅地方買衣飾，仲落手落腳幫安雅揀心水服飾，完全係廿四孝嘅好老公。採訪、攝影：
梁繼光、楊浩賢、李志明
