肥仔Ｋ在八月失業，唔駛申請假期，於是索性走咗去東京旅行成個幾月先至返嚟。邊度有咁多錢住酒店呀？原來肥仔Ｋ最初住在平價酒店，有時去朋友屋企瞓廳，最後憑昔日留日同學之助，入住大學宿舍（日本在八九月係學校暑假），至於飲食咯喎，肥仔Ｋ話：「識搵地方食平嘢嘅唧。」
搵到一位日裔美國人朋友，佢在芝加哥大學畢業，日本某大學博士，諗住一齊去玩，點知呢位朋友剛啱失業，要掛住搵工，冇心機去，點解會失業呢？朋友話：「我在東北某大學教書，係校內少有可用英文、日文教書，兼可以同外國學生交流嘅助理教授，學校話我表現相當好。點知放暑假前，系主任召見，話所有日本大學都缺乏學生，收入下降，我校位處東北，受福島事件、海嘯影響，地區經濟未能恢復，大學當局必須開源節流，裁減教師，我咪唔好彩囉！」資歷好、教書好、語言好嘅教授都要開除？肥仔Ｋ留日三年，當然明白其中道理，所有日本機構如要裁員，都係依論資排輩原則，新人、年青人最為高危，遲來先炒，反而教咗三十年並無寸進嘅老教師仍會留任。
朋友失業，因做開助理教授，在學界未打開名堂，在今日日本，搵番一份同樣職位並不容易，好彩佢既然從日本到芝加哥大學讀書，屋企有番咁上下（否則點交學費呀），生活不愁，只不過心有鬱鬱結而已。肥仔Ｋ聽完朋友訴苦，花時間上網，發覺日本私立大學多到不得了，日本人生育率低，根本極度缺乏十八歲入學嘅大學生，於是每間大學都盡量招收海外學生，海外青年申請入學並不困難，識得窿路嘅話，入名校都有辦法。目前留日亞洲學生之中，以中台韓人士最多，台韓年青人好多都識得日文，到日本好自然，中國學生呢？勝在有膽識，夠衝勁，乜都唔識就報讀日語專門學校，一年後就考大學，因勤力驚人，考到嘅機率又好高喎！左丁山問：「佢地帶錢去讀書咩？」肥仔Ｋ話：「冇錢㗎，去到日本註冊入學，攞到學生證就去搵工嘅嘞，餐廳企堂，拉麪店洗碗，乜都做，薪水叫做唔錯。你叫我睇過劉紹銘《吃馬鈴薯的日子》，家中台韓留日學生就係過一啲吃粗飯拉麪的日子，冇話唔掂嘅！」