關愛基金兩年前推出時，政府誓神劈願話商界會捐50億元，政府另「貼」50億元湊夠100億元。當年成班富豪搶住認頭，誠哥捐5億、四叔捐4億、新地郭氏兄弟又捐4億，就連大劉同華置都合捐2億。雷聲就夠大嘞，點知爛尾收場，連埋其他富豪，政府至今都只係籌到18億元，仲要分3期收錢，由舊年到家，實收只係得果6.8億元。八方噚日問關愛基金執行委員會主席羅致光（圖），籌款進度有乜眉目，佢慨嘆咁話，已經冇籌款好耐喇。套用胡紅玉嘅說法，咪即係籌款「失效」？咁係咪已經放棄籌款呢？羅致光講笑咁話，八方都可以幫手介紹啲富豪捐錢。咁就有難度啦，唔少超級富豪向來同狼振英冇傾偈，況且關愛基金係當年唐唐嘅「功績」，又點會「過戶」畀狼英？