噚晚抵達北京嘅熱火，周日已開始佢哋嘅季前賽行程。呢支衞冕球隊首戰對鷹隊，喺冇主力之一獲迪嘅情況下，以79:92慘敗喺有J史密夫攻入21分嘅鷹隊手上。
大帝技癢頻鋤樽
「三頭犬」缺一，攻力當然有影響。不過唔緊要啦，季前賽旨在熱身，畀班球員攞番個比賽感覺啫。所以講到明唔會上陣太耐嘅「大帝」勒邦占士，只係打咗23分鐘；佢都打得唔錯㗎，咁少上陣時間都有10分、6個籃板球同6次助攻，仲周不時大力入樽娛賓。佢老友保殊仲勁，同樣嘅上陣時間，有22分進賬，6個籃板球當中，有3個係進攻籃板。
另一個焦點，當然係今季加盟嘅「3分王」阿倫啦，雖然成37歲人，運動能力衰退唔少，但係完全冇問題，打咗半個鐘都貢獻咗10分、3次偷波。但係對手今場火力太猛；除J史密夫之外，仲有L威廉士6射5中得18分，所以最後熱火輸13分都無可厚非。
至於熱火中國賽對手快艇，隊中中鋒D佐敦周一喺Twitter上載佢同隊友基斯保羅、比歷克格芬，喺飛機上嘅相。一班人勁有精神，好似冇乜時差影響喎！