喜─用「睇得又打得」來形容香港倫奧花劍美少年崔浩然（Nic、左三），真係貼切不過。呢位19歲有韓國血統嘅劍手，唇紅齒白，星味十足，8月去完倫奧後，如有神助，喺印尼峇里舉行嘅亞洲青年劍擊錦標賽，攞完個人賽金牌後；噚日喺男子花劍團體賽，同3名師弟楊子加、譚鈺宏同張家朗再殺出重圍，決賽以45:42擊敗南韓隊奪冠，成為「雙金」得主。Nic下個目標係明年4月嘅世青賽，希望佢繼續神勇，為港隊歷史爭牌就好喇！
除咗Nic外，香港青年劍擊隊其他成員亦十分威威，合力擸走4金3銀2銅，金牌除Nic嘅男子花劍嗰兩面外，仲有男、女子重劍團體。大家想一睹佢哋嘅風采，可以喺今日晏晝兩點半到機場接機，或者12月8號同9號，去香港公園室內場舉行嘅會長盃幫佢哋打氣啦！