證券行低佣搶客根本冇肉食，惟有靠借孖展賺息差，但家個市咁靜，叫人借孖展炒股仲難過叫港交所（388）還原個半鐘食飯時間。計仔多多嘅耀才（1428）主席葉茂林又有新噱頭，仿照買樓模式，推股票分期供款計劃，玩花臣吸引人借孖展買股。
似供樓又似玩期權
根據呢個計劃，耀才客仔開個孖展戶口，買股（以藍籌為主，共60隻股份）時可畀三成首期，耀才借出其餘七成，客仔喺一年內每月分期還款，年息P減1.75厘（即3.5厘），息率比一般孖展息4.88厘低。不過，客仔一年內想中途放咗隻股，要先找清尾數，再罰1厘息。而且，供緊隻股如果大跌，客仔要按原先買入價供款，即係繼續接貨，斷供超過一期，又可能俾耀才放咗隻股（咁同斬倉有乜分別？）。照咁睇，呢個計劃同玩期權差唔多，仲要畀孖展息，抵唔抵玩真係你諗你。