海迪有唔少友人，由iPhone 5開始有得預訂起，每日早上9點就自動自覺上網登記，已連續18日，天天如是。但截至噚日，海迪身邊嘅朋友、又或者係朋友嘅朋友，冇被抽中過。有IT界人士向海迪形容，iPhone 5肯定係史上最難買到的蘋果產品，試過晚上和朋友食飯，9點過後至少有半枱人會check email，然後嘆一句：「又抽唔到喇！」iPhone 5之所以難抽，其一當然是蘋果決心打擊水貨。據講iPhone 5今年淨係喺香港加咗價500蚊，可以話呢500蚊係蘋果淨賺香港人。但除咗針對炒賣之外，更多人開始關注蘋果的供應能力係咪出咗問題。無獨有偶，蘋果最大組裝商富士康，兩個禮拜內喺太原和鄭州廠都發生糾紛，有工人話蘋果品質控制嘅要求，已經苛刻到根本做唔嚟。富士康老闆郭台銘曾經形容，要管理100萬頭「動物」，每日都好頭痛。海迪認為就係佢把工人當成是「動物」咁管，呢種去人性化嘅管理方法，先係一切混亂問題嘅根源！隨住蘋果嘅技術要求、銷售規模去到呢個水平，供應緊張有機會成為常態，蘋果肯定要諗計分散生產風險，經常出事嘅富士康，請好自為之。海迪